Home is a place you grow up wanting to leave, and grow old wanting to get back to

Jæja - þá er komið að því að pakka saman og halda í norðurátt... svo hér koma síðustu myndirnar frá Ástralíu í bili... að minnsta kosti...
Veðrið hefur verið - ekki alveg eins og það er vant að vera - við þekkjum það frá Króknum - ekkert sumar í fyrrasumar...
Hér hefur rignt meira í byrjun sumars - en gerst hefur í áraraðir - og meira að segja hafa komið haglél sem skemmt hefur bíla og hús...
Það varð nú ekki svo slæmt hjá okkur - en það rigndi fjandann ráðalausann, meðan Sigurþór grillaði einn daginn....

...veit ekki alveg hvað mér finnst um þennan klæðnað á þeim gamla - svo óvön að sjá hann svona...

....það var smádýragarður í einu Mollinum sem við Unnur heimsóttum fyrir jólin - og þessi líka flotti Bambi - eða á ég að segja FLOTTU Bambar...;°)...

...Sigurþór gerði sundlaugina tilbúna til notkunar - áður en fór að hitna verulega - og mikið skratti var gott að stinga sér í kalda vatnið...

...sá þessa flottu rúmfatakistu í húsgagnaverslun - búin að leita lengi að svona - ætli ég verði ekki bara að hafa þetta sem smíðaverkefni fyrir hann Finn minn - hefur þá nóg að gera næsta árið....

..... og svo kom hún aftur - en sennilega er þetta önnur en sú sem ég veiddi á eldhússkápnum - þessi hefur 8 fætur - hin hafði bara 4 framfætur - misst hina í slagsmálum eða eitthvað... þessi birtist á stofuveggnum einn daginn - og hvarf svo bara aftur næsta dag...

... aðfangadagur jóla - Kerry og Kiddi komu í mat og við áttum bara kyrrlátt kvöld - Kiddi greyið varð að lesa á pakkana þar sem hann er yngstur af okkur .... okkur vantaði svo sannarlega eitthvað af börnum - enda 3 ömmur á staðnum...

...maturinn ekki af verri endanum - frekar en endranær hjá Unni - hangikjöt og skinka - með uppstúf, grænum baunum - einskonar malt og appelsín... það kom mér skemmtilega á óvart hvað hangikjötið var gott, því Unnur var búin að segja að það væri ekkert varið í það miðað við það íslenska - en þetta var bara fjandi gott kjöt skal ég segja ykkur...

....á jóladag fórum við í hádegismat til Kerry - börnin hennar tvö - Izzy og Jasper voru þarna líka.. það voru fiskréttir á borðum - fyrst var skelfisk-súpa - sem mér finnst orðin alveg ótrúlega góð - síðan fengum við "scallops" sem er hörpuskel - og loks kom heill humar - rækjur og ostrur ..... það tók okkur um það bil 3 tíma að borða þetta allt - allt gert meira og minna með puttunum - því allt þurfti að skelfletta - ég prófaði ostrur í fyrsta skipti - það var ekki beint geðslegt að setja þetta upp í sig og renna því niður - án þess að tyggja - en eftirbragðið - já - það var bara fjári gott..... gaman að prófa svona eitthvað alveg nýtt um jólin...

...Kerry stóðst ekki mátið - að leika sér smá með humarinn... en Unnur er háalvarleg að pilla rækju...

.... svona líta ostrurnar út - þessar hráu - hún var líka með grillaðar í skel með beikoni - en þær skildu ekki eftir eins gott eftirbragð..

...rækjurnar horfðu stórum augum að þetta lið sem þræddi eina og eina upp - pillaði hana og stakk upp í sig...

.... en nú er komið að heimferð - og ég verð að segja að ég hlakka rosalega til að sjá alla ungana mína stóra og smá aftur - búin að sakna þeirra rosalega.... þetta er búið að vera alveg yndislegur tími hérna hjá Unni og Sigurþór -  en nú er tími til að koma sér heim - kannski ekki beint gaman fyrir þau - að um leið og börnin eru flogin úr hreiðrinu - þá sest ég upp hjá þeim...;°)...

.... Elsku Unnur og Sigurþór - ástarþakkir fyrir allt sem þið hafið gert fyrir mig - þið eruð alveg yndisleg hjón - sem allt viljið gera fyrir aðra - takk fyrir að leyfa mér að setjast upp hjá ykkur síðustu 3 mánuði - og ég vona að ég geti einhvern tíma endurgreitt ykkur á einhvern hátt ... Nú er tími fyrir ykkur til að fara bara að hugsa um ykkur sjálf - njóta lífsins saman - þið eigið það svo sannarlega skilið... love ya guys - your´e the best friends one can wish for...

A hug is a great gift - one size fits all, and it's easy to exchange. ~Author Unknown



..... tengdapabbi var vanur að segja að ég væri "veðurkráka" - það kæmi alltaf rok og rigning þegar ég
birtist í Kópavoginum... þetta sannaðist þegar við Finnur ákvaðum að fara í smá ferðalag hér Down Under... Meiningin var að skreppa inn í landið - keyra til Kalgoorlie, sem er gamall gullnámubær, við vorum búin að plana ferðina - 3 dagar - ákveða hvað við ætluðum að skoða - hvar við ætluðum að gista og allt þar fram eftir götunum...  Nema hvað, þegar við vorum að leggja af stað, gerði þetta líka litla þrumu-og eldingaveður - allt fór á flot á leiðinni sem við ætluðum og viðvaranir voru lesnar í útvarpinu!!! Nú voru góð ráð dýr, við vorum búin að pakka í töskur og komin í ferðagírinn - ekki alveg tilbúin að fara bara heim aftur - svo við ákváðum að keyra upp með ströndinni - veðrið átti bara að ná rétt "upp" fyrir Perth... en það var eins og það elti okkur bara - ef við stoppuðum þá náði það í rassgatið á okkur - og á okkur skall ÞVÍLÍK rigning að við sáum varla út um framrúðuna... þessu linnti svo ekki fyrr en við vorum búin að keyra í eina 3 klukkutíma - shitturinn - ég held bara að tengdapabbi hafi rétt fyrir sér... ;°)...

..loksins þegar látunum linnti, stoppuðum við á bensínstöð og heilsuðum upp á þessa EMU fugla - alveg stórskrítnir...

.... við ákváðum að stoppa í litlum bæ sem heitir Dongarra (borið fram DONGRA!!), og ætluðum að fá hótelherbergi - en þar var allt fullt á öllum stöðum - vegna þess að kona hafði myrt 2 dætur sínar og síðan framið sjálfsmorð - allir gististaðir fullir af lögreglu - "forensic" fólki - sjónvarps- og blaðafólki..
En svo vorum við svo "HEPPIN" að rekast á eitt hótel sem hafði EITT herbergi eftir - þetta var í gömlu klaustri og leit alveg sæmilega vel út - utan frá séð... en restin af gestunum voru löggur og rannsóknarfólk - svo við vorum í miðri lögreglurannsókn í morðmáli... segið svo að maður lifi ekki spennandi lífi.....
En það koma nú svolítið skrítinn svipur á okkur, þegar við sáum herbergið - sem við þurftum að borga 12. þús. kr. fyrir... dæmi nú hver fyrir sig...

...stærsti plúsinn var kannski að það var "MINIBAR" - TV - og LOFTKÆLING í herberginu... sbr. myndin hér að ofan...

....daginn eftir ákváðum við að keyra aðeins inn í landið og fara leiðir sem við höfðum ekki farið áður - á þessum vegum eru mikið flutningar - kallaðir "road-train" - sem eru vörubílar með 3-4 tengivagna í eftirdragi.... ekki mjög gaman að lenda við hliðina á þeim - né mæta...

... við vorum á bílaleigubíl sem var hinn þægilegasti - Toyota Camry - og hann kostaði okkur ekki nema um 30 þús fyrir 4 daga...

.... á leið inn í landið keyrðum við framhjá korn- og hveitiökrum - svo langt sem augað eygði - spáðum mikið í það hvað lengi væri verið að slá þarna...;°)...

...þessir bændur sátu og spjölluðu við vegkantinn - og höfðu litlar áhyggjur af umferðinni sem þeyttist framhjá...

...við keyrðum framhjá nokkrum svona stöðvum - þar sem korninu er safnað í heljarninna þrær - þarna sést ekki nema lítið brot af lengjunni...

....við lentum í því að bjarga þessari eðlu frá því að verða undir bíl - konuræfill sem hafði stoppað - fékk hana undir bílinn hjá sér og það tók smá tíma að fá hana undan honum...

... hér eru bændur byrjaðir að "slá" kornakurinn - kannski ekki bestu vinnaðstæður - all á kafi í ryki og skít... en engar "smá" vélar...
Næsti bær sem við ákváðum að stoppa í og gista, heitir Moora - og þar tók ekki betra við með að fá herbergi... Finnur vildi endilega gista á svona "gömlu" hóteli með stórum svölum - hefur örugglega viljað fá tilfinningu fyrir hvernig "HÓRUNUM" leið þegar þær röðuðu sér við handriðið og tældu menn upp á herbergin í den tid...;°)...

Mér leist nú ekkert á hótelið sem við fundum - en ákvað samt að slá til og við leigðum herbergi fyrir aðrar 12 þús kr...





Framhliðin leit svo sem ekkert illa út - en við þurftum að leggja bílnum á bak við og fara þeim megin inn í hótelið - framhjá ruslatunnunum og draslinu - þegar inn var komið blöstu við veggir með bárujáni og á járninu voru - ja Finnur sagði ryðblettir - en ég held því fram að þetta hafi verið myglublettir... og það lá við að ég sneri við og segði NEI...



...svona litu nú svalirnar út og opið er inn í herbergið sem við leigðum dýrum dómum - ef þið skoðið vel getið þið séð skítinn á borðinu.... ekki mikið fyrir að þurrka af þetta lið... herbergið var eins og klefi í rússneskri afvötnunarstöð - ekki að ég hafi heimsótt slíka stöð - en ímynda mér að hún líti svona út... máttu samt eiga það að "fataskápurinn" var VEL loftræstur...

....baðherbergisaðstaðan var sameiginleg fyrir alla hæðina - og þar keyrði heldur betur um þverbak - skil bara ekki hvernig fólki dettur í hug að bjóða upp á þetta - og ég hafði alls enga löngun til að fara í sturtu - þó svo að full þörf væri á því eftir hitasvækju dagsins...

....ég ákvað bara að breiða upp yfir haus og sofa þetta allt frá mér - yfirgáfum svo þetta "fína" hótel fyrir morgunmat - tókum ekki séns á að hann liti nokkuð skár út en sjálft húsið....

....ekki spurning að maður tók eftir þessari auglýsingu.... vorum bara að fara í hina áttina og nenntum ekki að snúa við...

... ég tók þessa mynd alveg sérstaklega fyrir Þórdísi - ekkert smá flottur litur  á beljunum - væri til í að fá svona lit í hárið Dísa mín...

Unnur og Sigurþór buðu okkur út að borða þegar við komum heim - svona í tilefni þess að ég átti afmæli - aldur er afstæður - við fórum að rosalega skemmtilegan stað sem heitir Roly on the Ridge - þar horfir maður út yfir fallegan dal ....

....ég fékk mér nautasteik - og bara varð að smella mynd - flott skreyting - nú er ég að verða eins og Sigga frænka - alltaf að taka myndir af því sem ég borða...;°)... góðar Sigga mín....

....Unnur tók mynd þegar komið var með dessertinn til mín - og aldrei þessu vant - þá bara myndast ég alveg ágætlega - enda í góðu kompaníi með Finni mínum og....

 

..... með Unni og Sigurþór - takk fyrir mig - þið eruð algerar perlur og ekki slæmt að eiga svona vini...



.... að kvöldi 9. des. buðum við Hilmari, Söndru, Jónka syni þeirra, Jómba og Lóu í indverskan dinner - þetta var alveg yndislegt kvöld og gaman að hittast öll saman...

.... kvöldið eftir héldum við svo "litlu jólin" - þar sem Anna var á leið til Íslands yfir jól og áramót og Finnur fer í vinnuna eftir viku... við vorum með alveg EKTA íslenskt - lambahrygg, brúnaðar kartöflur, sósu, Ora grænar, rauðkál og svo auðvitað - malt og appelsín, sem by the way - ég FÉKK ekki að smakka þar sem maltölið hér er yfir þeirri prósentutölu sem ég þoli í áfengi...;°)... lét mér duga sódavatnið....

... eftir matinn eyddum við svo kvöldinu í að fylgjast með tunglmyrkvanum - en því miður er ég ekki með nógu góða vél til að taka svona myndir - svo þessar verða að duga.... Tunglið varð á endanum appelsínugult - stórkostlegt að sjá þetta svona í "beinni"...

.... En að öllu gríni og gamni slepptu - þá hefur síðasta rúma vika ekki verið neitt auðveld - þegar sorglegir atburðir gerast í fjölskyldunni, er erfitt að vera svona langt í burtu frá sínum nánustu - geta ekki tekið utan um og huggað.... En það er gott til þess að vita að ég á tvær frábærar stelpur og tvo frábæra tengdasyni - sem standa saman og eru til staðar hvert fyrir annað, einmitt þegar á þarf að halda. Ég er óendanlega þakklát fyrir þau öll og barnabörnin mín - og á þeim öllum get ég séð, að okkur Finni hefur tekist eitthvað gott og frábært í þessu lífi okkar...

....þið öll eruð það sem heldur mér gangandi og í góðum gír til að takast á við það sem lífið býður upp á hverju sinni - ELSKA YKKUR ÖLL og hlakka til að sjá ykkur... 

 

To me, family means putting your arms around each other and being there.



 ....það tóks loksins að veiða köngulóna sem hafði hreiðrað um sig í loftinu hjá okkur, hvarf svo en birtist svo allt í einu á miðjum eldhússkáp.... það er hægt að umbera þær ef þær halda sig í hæfilegri fjarlægð - en að koma niður undir matarborðið - NEI - þá segjum við stopp.... alla vega - ég veiddi hana í plastdollu - hún var nú mun minni um sig en manni sýndist áður... henni var svo bara hent út í skóginn hér fyrir utan... mér varð þó svolítið um og ó þegar Anna kom í heimsókn um kvöldið og uppfræddi okkur um "Huntsman" köngulær - þær eiga það til að bíta og eru "svolítið" eitraðar - en - ég er á lífi...;°)...

..... rakst á þennan heiðursmann niður í bæ um daginn - datt nú Stebbi mágur í hug... Stebbi, þetta er hugmynd fyrir þig - ef þú vilt hætta á sjónum - kallinn stórgræddi þarna, enda góður á nikkuna eins og þú...

...Anna tók að sér að skreyta jólatréð - þó það væri bara byrjun desember... hún er á leið til Íslands, ætlar að eyða jólum og áramótum á Króknum...

.... það voru haldnir tónleikar í skólanum hjá Unni - kveðjutónleikar áður en þau flytja í nýja skólann.. krakkarnir fóru yfir tímabilin í sögu skólans, og voru alveg óhræddi við að standa fyrir framan fjölda manns...

...þarna voru samankomin afar, ömmur, pabbar, mömmur, frændur og frænkur - gamlir nemendur skólans - kennarar og skólastjórar -

...þetta er leiksvæði krakkanna - fer ekki mikið fyrir leiktækjum - skógurinn er þeirra heimavöllur...

.....þarna stýrir Unnur sínum krökkum rétta leið niður af sviðinu og þau hlýddu skilyrðislaust...;°)...

.....um 140 börn í "Kindy" - held að það sé nokkurs konar forskóli - stóðu og sungu á sviðinu í einu - flott hjá þeim...

.... að lokum tróðu núverandi kennarar upp og sungu titillagið úr Star Trek - klædd eins og áhöfnin á - ja nú man ég ekki hvað fjárans geimskipið hét - Enterprise eða....???? því miður var farið að skyggja og ég náði ekki betri mynd en þetta.... Unnur er falin einhvers staðar á bakvið - erfitt að ná mynd af henni stundum...;°)...

....eftir tónleikana fórum við út að borða á þennan stað - finnst þetta nú ekki mjög aðlaðandi nafn á veitingastað - en.... steikin var góð...

Finnur er kominn Down Under - ætlar að vera hjá mér til 16. des. - við skruppum aðeins í bæinn og það eina sem keypt var - var þessi flotti hattur úr kengúruskinni... en svipurinn á honum mætti vera glaðlegri - eða hvað finnst ykkur...?? ;°)...